A achega de Antonio Palacios ao conxunto arquitectónico do Balneario de Mondariz xorde tras a solicitude do director do mesmo nesa época, Enrique Peinador Linares, quen formulou a Palacios o encargo da mellora e ampliación do complexo xa iniciado a finais do S.XIX por Jenaro de la Fuente Domínguez coa construción do Gran Hotel. Palacios ocúpase do deseño do edificio A Baranda e dun extraordinario templete abovedado de inspiración clásica, o Pavillón da Fonte da Gándara. Nesta obra é posible distinguir innumerables elementos que lembran a outras obras ben coñecidas do arquitecto, como o Palacio de Telecomunicacións en Madrid ou o Teatro García Barbón (hoxe Teatro Afundación) na próxima cidade de Vigo.