Antonio Palacios é nomeado arquitecto da compañía de ferrocarril metropolitano en 1917. Será este un dos seus traballos máis importantes xa que lle permitirá impactar de novo, intensamente, na imaxe de Madrid, ao definir tanto a aparencia externa do novo medio de transporte subterráneo como a liña decorativa dos seus interiores.

Palacios foi o arquitecto da compañía durante máis de 25 anos, tempo no que colaborou na construción das liñas 1, 2, 3 e 4, así como dos seus edificios auxiliares, entre os que debemos destacar o deseño do Templete de acceso á estación de Gran Vía, recentemente reconstruído no seu emprazamento inicial (mentres que o Templete orixinal foi trasladado ao Porriño, localidade natal de Palacios, na década dos anos 70 do século pasado).

Actualmente, o Metro mantén, en certa medida, o selo de Palacios no seu logotipo, nos azulexos que se seguiron utilizando e nas varandas de ferros enroscados que se foron conservando en moitas das bocas do metro de Madrid.

Fonte: Antonio Palacios. Constructor de Madrid. VVAA, Círculo de Bellas Artes, Madrid, 2001.